Yanvarniñ 8-nde saba Rusiyeniñ Ukrayinağa ücüm etkeninde 18 raketa tüşürilgenine baqmadan, " tüşürilgen raketalarnıñ faizı aynı qala", dep qayd etti Ukrayina telemarafonınıñ yayınında Ukrayina Arbiy-ava quvetleri komandanlığınıñ spikeri Yuriy İgnat.
''Ballistik raketalarnıñ sayısı çoq edi, böyle nişanlarnı tek Patriot kibi sistemalar urıp tüşüre bilecek vastalarnen urıp tüşürmek mümkün. Onıñ içün bugün böyle bir neticeler oldı, çünki çoqusı insanlarnıñ aytqanına köre, urıp tüşürüv seviyesi pek yüksek degil. Faiz aynı qala", - dep añlattı o.
İgnatnıñ aytqanına köre, "ebet, X-101 daa çoq tüşürmege istey edik, amma, ava ücüminiñ bu miqdarını köz ögüne alsaq, 24-ten 18-i de yaramay bir netice degil".
''Ücümler eksilmekte. Dekabrniñ 29-nda 158 ava ücüm vastaları bar edi, soñra 134, şimdi ise 59 oldı'', - dep bildirdi o.
Yanvarniñ 8-nde gece ve saba Rusiye arbiyleri Ukrayina territoriyasına 51 çeşit raketa ve "Shahed-136/131" tipindeki sekiz ücüm dronnı qullanıp, kene de kütleviy bir raketa darbesini yaptılar, bunen beraber, altı "İskander-M" ballistik raketa işğal etilgen Qırımnıñ Canköy rayonından ve Çauda burnundan uçurıldı.
Rusiye arbiyleri işğal altındaki Ukrayina topraqlarını, şu cümleden mülkiy obyektlerni muntazam sürette ateşke tuta. Delillerge baqmadan, Moskva bu darbelerniñ maqsadı Ukrayinanıñ arbiy infraterkibi olğanını iddia ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
