2021 senesiniñ başında Kreml kontrolindeki Qırım mahkemelerine Rusiyede askerlik yapmaqtan qaçınğan qırımlılarğa qarşı 13 cinaiy dava berildi. Bu aqta Qırım aq qorçalayıcı gruppasınıñ talilcisi Aleksandr Sedov Qırım.Aqiqat Radiosınıñ yayınında ayttı.
«Yanvar ayında askerlik yapmaqtan qaçınğan qırımlılarğa qarşı açılğan 13 cinaiy dava berildi, ve 13 üküm çıqarıldı. Soñkisi – yanvarniñ 29-nda. Qıyaslamaq içün, çıqarılğan üküm ve mahkemelerge berilgen dava sayısına köre bayağı ciddiy olğan 2020 senesiniñ başında, yanvar ayında üç cinaiy dava berildi», – dep bildirdi Sedov.
Onıñ malümatına köre, 2020 senesi Rusiyede askerlik yapmaqtan qaçınğan qırımlılarğa qarşı açılğan 81 yañı cinaiy davanıñ Kreml kontrolindeki mahkemelerge berilgeni qayd etildi.
Qırım aq qorçalayıcı gruppasınıñ malümatına köre, böyle davalarnıñ sayısı 163 oldı.
Qırım aq qorçalayıcı gruppası yarımadada insan aqları ve halqara uquqqa riayet etüv vaziyetine dair esabatında 2014 senesinden başlap yarımadada 28 biñden çoq yarımada sakini Rusiye ordusına alındı, dep bildirdi.
2020 senesi oktâbrniñ 1-nde Ukraina Tış işler nazirliginiñ bildirgenine köre, 2014 senesinden başlap tahminen 25 biñ insan işğal etilgen Qırımda Rusiye ordusına alındı.
Qırım Muhtar Cumhuriyeti ve Aqyar Prokuraturası Kezlev ve Saq arbiy komissarına «qırımlılarnı Rusiye Silâlı quvetlerinde askerlik yapmağa zorlağanları içün» şübheli olğanını haber etti.
Qırım işğalinden soñ Rusiye yarımada sakinlerini öz silâlı quvetlerine askerlikke ala. Ukraina Tış işler nazirliginiñ malümatına köre, soñki altı yılda tahminen 25 biñ qırımlı ve aqyarlı Rusiye ordusına yollanıldı.
Human Rights Watch halqara aq qorçalayıcı teşkilâtı, 2019 senesi baarde arbiy hızmetke çağırılğan qırımlılarnıñ tahminen 85%-ı qomşu Rusiyedeki bazalarğa yollanıldı, dep bildirdi.
BM, Rusiye Qırım sakinlerini öz silâlı quvetlerine çağırmamalı, dep çoq israr etken edi. Teşkilât, Moskvanı halqara uquqqa riayet etmesine çağıra.
Rusiye Ukraina ve halqara teşkilâtlarnıñ beyanatlarına qulaq asmayıp, yarımadada askerlik kampaniyasını devam ettire. Em de askerlik yapmağa istemegen Qırım sakinlerini taqip ete. «Qırım aq qorçalayıcı gruppasınıñ» malümatına köre, 2020 senesi iyül ayına qadar Rusiye Silâlı quvetlerinde askerlik yapmaqtan vazgeçkenlerge qarşı 125 cinaiy dava açıldı, olar Qırım mahkemelerine berildi. 113-üniñ ükümleri çıqarıldı, daa 12-si baqılmaqta.
Qırım Muhtar Cumhuriyeti ve Aqyar şeeriniñ prokurorı İgor Ponoçovnıy, Rusiye ordusına çağırılğan Qırım sakinleri esas Ukrainada cinaiy taqipke oğratılmaycaq, dep haber etti.
Müessise, Rusiye ordusında askerlik yapacağına dair celpname alğan qırımlılardan telefon ya da elektron poçta vastasınen muracaat etmelerini rica ete.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
