Ukrainanıñ sabıq prezidenti Viktor Yanukovıç Ukrainağa qaytmaq istey, dedi “İzvestiya” Rusiye matbuatına onıñ advokatı Vitaliy Serdük, dep bildire Azatlıq Radiosınıñ ukrain hızmeti.
“Kerçekten, Viktor Yanukovıçnıñ qaytmaq niyeti bar. Ve biz bunıñ oğrunda onıñ aqları içün başlağan küreşimizniñ birinci künlerinden çalışamız. Zelenskıynıñ saylavı Viktor Yanukovıçnıñ istegine iç tesir etmez. Em de yapqan işimizge tesir etmez: küreşkenimiz kibi küreşecekmiz”, - dedi Serdük.
Merkeziy saylav komissiyası ekinci turı aprelniñ 21-nde keçirilgen Ukraina prezidenti saylavları prokotollarınıñ 100%-ını teşkerdi. Bu malümatqa köre, şoumen Volodımır Zelenskıy 13 541 530 rey (73.22%) qazandı, Ukrainanıñ şimdiki prezidenti Petro Poroşenkoğa ise 4 522 320 saylayıcı (24,54%) qoltuttı.
Aprelniñ 22-sinde Viktor Yanukovıç Volodımır Zelenskıynı Ukraina prezidenti saylavlarında ğalebe qazanğanınen hayırladı. Zelenskıynıñ ştabı, cevap olaraq, Yanukovıçnıñ hayırlavlarında iç acet olmağanını bildirdi.
Yanukovıç, 2014 senesi qışta Kyiv merkezinde Yevromaydan vaqtında kütleviy adam atışlarından soñ Ukrainanı terk etti.
