Yañı yıl gecesi Rusiye ordusı Ukrayinağa dört yönelişte 111 uçucısız uçaqnen ücüm etti, dep aytıla Ukrayina Arbiy-ava quvetleriniñ haberinde. Olardan bir qısmı işğal etilgen Qırım territoriyasından yollanıldı.
"2025 senesi yanvarniñ 1-ne keçken gecesi duşman Brânsk, Orel, Primorsk-Ahtarsk, Qırım yönelişlerinden 111 "Şahed" tipindeki dron ve diger tiplerniñ uçucısız uçaqlarınen ücüm etti", — dep bildire Ukrayina Arbiy Silâlı quvetleriniñ Ava quvetleri.
Ukrayina arbiyleriniñ malümatına köre, ava ücümini aviatsiya, zenit raketa orduları, REB bölükleri, Ukrayina Arbiy ava quvetleri ve Mudafaa quvetleriniñ mobil ateş gruppaları qaytarğanlar.
"Saat 09.30 itibarınen 63 "Şahed" tipindeki dron ve diger tiplerniñ uçaqları tüşürilgenini tasdıqladılar", — dep qayd etti ukrayin arbiyleri.
Belli olğanı kibi, ava mudafaası Poltava, Sumı, Kıyiv, Çerniğiv, Çerkası, Zaporojjâ, Jıtomır, Hmelnitsk, Kirovoğrad ve Mıkolayiv vilâyetlerinde çalıştı
Bundan ğayrı, Mudafaa quvetleriniñ faal qarşılıq kösterüvi neticesinde 46 duşman uçucısız uçaq-imitatorları lokalizatsion ceetten ğayıp oldı, daa ekisi Rusiye ve Belarusqa uçıp ketti.
Rusiye arbiyleri Ukrayina regionlarına çeşit silâlarnen muntazam sürette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
