Rusiye ordusı tarafından işğal etilgen Nova Kahovkada yerli suv elektrik stantsiyasınıñ patlatıluvı ve soñradan yüz bergen suv taşqını neticesinde "Kazkova dibrova" ayvanat bağçasında tutulğan yüzlernen ayvan boğulıp öldi.
Müessiseniñ müdiri Olena Navrotskayanıñ aytıp bergenine köre, hadimler sabaa saat 6-da ayvanat bağçasına kelgende artıq er şey suv tübünde edi, "ayvanlarnıñ cesetleri ve binalarnıñ parçaları yalday edi". Berilgen malümatqa köre, üç yüzge yaqın ayvan ölgen, olarnıñ arasında yeşil maymunlar, tavuslar, yanatlar, sızğırlar, papağanlar, qır tavuqları, poni, eşek, Kamerun eçkileri. Yalıñız bir qaç aqquş ve papiy qurtuluıp olğan. Al-azırda "Kazkova dibrova" kompleksi bütünley suv tübündedir.
Ayvanat bağçasınıñ resmiy saifesinde, yaqınlardaki topraq Rusiye arbiyleri tarafından minalanğanı içün ayvanlarnıñ tahliyesi imkânsız olğanı bildirile.
"Yarıqsız, qızdıruvsız, daimiy ateş astında qıyın qışnı keçirdik... Atta böyle deşetli vaziyette ayvanlarnıñ ayatını qurtarmaq içün elimizden kelgenini yaptıq. Bu deşetli ağrıdır. Bizge yardım etmek istegen er kes sağ olsun. Amma yardım artıq kerek degil", - dep yazıla ayvanat bağçasınıñ reberliginiñ beyanatında.
İyünniñ 6-nda saba Rusiye Herson vilâyetinde Kahovka suv elektrik stantsiyasını patlattı, dep bildirdi Ukrayina arbiyleri.
Ukrayına prezidenti ofisiniñ yolbaşçısı Andriy Yermak Kahovka Kahovka suv elektrik stantsiyası bentiniñ bozuluvı Qırımnı içilgen suvsız qaldıra bile, dep bildirdi. Mesleatçısı Mıhaylo Podolâk patlatuvnı Rusiye Silâlı quvetleriniñ 205-inci motor atıcı brigadası yaptı, dep tahmin etti.
Ukrayina milliy telükesizlik ve mudafaa şurasınıñ kâtibi Oleksiy Danılov Kahovka Kahovka suv elektrik stantsiyasınıñ patlatıluvı «Rusiye istilâsınıñ yañı basamağı» ola, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
