Rusiye kontrolindeki Yalta akimiyeti yıqılacaq 250 qanunsız binanı sayıp çıqtı. Şeerniñ merkezinden başlap, buña 13 million ruble (aman-aman 207 biñ dollar) masraf etmege planlaştıralar. Bu aqta şeer memuriyetiniñ saytında haber etile.
Şeer memuriyeti belediye kontroliniñ departament yolbaşçısı Ruslan Osipçuknıñ malümatına köre, laf tek qurulğan inşaatlar aqqında degil, ticaret noqtaları ve mağazlar aqqında da kete. Umumen Yalta akimiyeti 243 binanı saydı.
Memurnıñ bildirgenine köre, «şeerniñ merkezinde qanunsız binalarnı yıqmaq içün cumhuriyet bücetinden 13 million ruble miqdarında subsidiya ayırıldı». Osipçuknıñ qayd etkenine köre, ilk evelâ park, skver ve soqaqlarnıñ keçiş qısımlarındaki inşaatlar yıqılacaq.
Fevral ayında ilhaq etilgen Qırım akimiyeti «qanunsız qurulğan inşaatlarnıñ», şu cümleden turistler içün populâr olğan yarımadanıñ yalı boyundaki binalarnıñ, yıqıluvına 2019 senesi 300 mln ruble ayırılacaq, dep bildirgen edi.
İlhaq etilgen Qırımda ve Aqyarda yerli akimiyet qanunsız dep ilân etilgen ticaret inşaatlarınen küreşe. Tükân, qave, bazardaki ticaret noqtaları ve şifahaneler yıqılacaq.
2018 senesi aprel ayınıñ ortasında Qırımnıñ Rusiye akimiyeti yıqılacaq binalarnıñ cedvelini tize, dep haber etildi.
2018 senesi aprel ayınıñ soñunda Aqyarda 500-ge yaqın insan şeer akimiyeti izin bermegen mitingge çıqqan edi. Olar ticariy obyektlerniñ yıqıluvına qarşı çıqqan iş adamlarınıñ aqlarını qorçalamaq içün narazılıq bildirdi.
