«Mahsus arbiy operatsiyada» (Rusiye akimiyeti Ukrayınağa qarşı cenkni böyle adlandıra) iştirak etken yaltalılarğa Qırımnıñ cenübiy yalısında degil, Saq rayonında topraq damartısı sertifikatlarını berip başladılar.
Yalta şeeriniñ Rusiye yolbaşçısı Yanina Pavlenko birinci 46 kişi sertifikat aldı, dep bildire. Olar Rusiye gvardiyası ve OMON vekilleridir.
«Damartılar Mülk ve topraq munasebetleri nazirliginen şekillendirildi, er biri – tahminen 600 metr kârelik (şimdilik Saq rayonında, soñra – Yedi Quyu, Aqşeyh ve Aqmeçit rayonlarında). Şimdi anda hatlarnı abadanlaştıruv işleri keçirile», – dep bildirdi Pavlenko.
2022 senesi dekabr ayında Qırımnıñ Rusiye parlamenti Ukrayınağa qarşı cenkte iştirak etken qırımlılarğa bedava topraq damartılarını bermege izin berdi. Aprelniñ 7-nde belli olğanına köre, Rusiye kontrolindeki Qırım akimiyeti Ukrayınağa qarşı cenk iştirakçilerine topraq damartılarını berüv fermanlarını berip başladı. TASS Rusiye agentliginiñ malümatına köre, başta umumen 56 gektarlıq 511 damartı azırlandı. Episi Saq rayonında yerleşe.
Ukrayına akimiyeti bu qararlarnı boş saya ve Qırım Kyiv kontroline qaytqanda olar lâğu etilecek, dep tenbiley.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
