Yaltada 4 mustaqil ev ve çoq qatlı mesken evleriniñ 10 mağazı suvda qala, 19 abonentniñ gazı yoq, dep bildirdi Qırımdaki Rusiye Fevqulâde vaziyetler nazirliginiñ matbuat hızmeti.
«Al-azırda suvda qalğanlar: 4 şahsiy ev ve çoq qatlı evlerniñ 10 mağazı. 19 abonentniñ gazı kesildi: 16-sı Yaltada, 3-ü şirket ola», – dep aytıla müessise haberinde.
Fevqulâde vaziyetler nazirliginiñ malümatına köre, «Yalta tarihiy-edebiy müzeyiniñ» binasında bodrum qatı ve tarih ve arheologiya bölügi qısmen suvda qala. Umumen 19 metr kâreni suv bastı.
Fevqulâde vaziyetler nazirligi «Masallar alanı» müzeyinde Vodopadnaya özeni yalılarından çıqqanı içün capnı suv yuvıp aldı, 30 metrlik qora yıqıldı, dep bildirdi.
Как выглядит Ялта после «вселенского потопа» (фотогалерея)
Qırımnıñ Rusiye fevqulâde vaziyetler nazirligi idaresi bildirgenine köre, 2021 senesi iyünniñ 16-ndan 18-ne qadar küçlü yağanaqlar neticesinde 426 azbar, 356 ev, 18 içtimaiy ceetten müim obyektni suv bastı.
Qırımda sel aqibetlerini yoq etüv tedbirleri devam ete.
Akimiyet Qırımnıñ yedek fondundan 161 mln 160 biñ ruble yarımadadaki fevqulâde vaziyet aqibetlerini yoq etmek içün sarf etmege qarar berdi.
Rusiye prezidenti Vladimir Putin Qırımğa afat aqibetlerini yoq etmek içün «acele ve büyük» yardım köstermege emir etti.
