Yaltanıñ Krupskaya soq., 48 rayonında merkeziy suv borularında qaza oldı, evlerniñ bir qısmını ve maşinalarnı suv bastı. Bu aqta Yalta şeer yolbaşçısı Yanina Pavlenko telegram-kanalında haber etti.
«Bugün saat 12:00-larda 10-uncı mikrorayonda merkeziy suv boruları patladı. Binalarnıñ bazı birinci qatları ve maşinalar suv altında qaldı. Mülki zarar körgen er keste 112 telefonına haber etmelerini rica etem. Al-azırda vaziyet kontrol altında buluna. Suv borusınıñ qaza aqibetleri yoq etile. Kimse suvsız qalmaycaq, dep vade eteler», – dep bildirdi Pavlenko.
2021 senesi yazda Qırımda uzun quru bir müddetten soñ sel sebebi olğan sağanaqlar yağdı. Eñ çoq iyün ve iyül aylarında Yalta ve Keriç zarar kördi. Avgust ayında küçlü yağmurlar sebebinden Qırımnıñ şarqiy regionlarını kene suv bastı.
2021 senesi noyabr ayında işçiler Yalta özenini temizlegende iyul seli vaqtında coyulğan qadınnıñ cesedini taptı.
Qırımnıñ suv teminlevi
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
