Yaltadaki «Hizb ut-Tahrir davasınıñ» mahkemesinde imaye tarafınıñ tilşınası Yelena Novojilova sorğuğa çekildi. O, tahqiqat istegen tilşınaslıq dinşınaslıq ekspertizası «qabul etilemez». Bu aqta advokat Sergey Loktev Qırım.Aqiqatqa tarif etti.
«Novojilova bir sıra yañlış ıstıla bar, dep ayttı, böylece, o, daa evel çıralğan mahkeme hulâsasına menfiy qıymet kesti», – dedi Loktev.
Sergey Loktevniñ Qırım.Aqiqatqa bildirgenine köre, ekspertler gruppasınıñ tilşınaslıq-dinşınaslıq hulâsasına köre, «mahküm etilgenler akimiyetni zapt etmege, «Hizb ut-Tahrir» bölügini inkişaf ettirmege ve anda yañı azalarnı davet etmege tırıştı».
Yaltadaki «Hizb ut-Tahrir davasınıñ» nevbetteki oturışuvı sentâbrniñ 10-nda olacaq, daa bir şaatnıñ sorğuğa çekilmesi planlaştırıla.
Aprelniñ 4-nde haber etildi ki, Rostov-na-Donu Şimaliy-Kavkaz okrugınıñ arbiy mahkemesi Yaltadaki «Hizb ut-Tahrir davasını» temelden baqmağa başladı.
Dava boyunca qabaatlanğan Arsen Cepparov, Refat Alimov, Emir-Usein Kuku, Muslim Aliyev, İnver Bekirov ve Vadim Siruk 2016 senesi fevral-aprel aylarında Yaltada tutulğan ediler. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatladılar.
Ukraina Tış işler nazirligi Rusiyeden Yaltadaki «Hizb ut-Tahrir davasınıñ» mabüslerini azat etmesini talap ete.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
