Aqmescitteki «Hizb ut-Tahrir davasınıñ» mabüsleri Teymur ve Üzeir Abdullayevler, Ayder Saledinov, Rustem İsmailov ve Emil Cemadenov Aqmescit SİZOsında avuştırılğan Rusiyeniñ Krasnodarında buluna, dep bildirdi dekabrniñ 8-nde rusiyeli jurnalist Anton Naumlük.
«Dekabrniñ 14-nde Şimaliy-Kavkaz okrugınıñ arbiy mahkemesinde esnasları başlaycaq», – dep yazdı Naumlük Facebook saifesinde.
Onıñ aytqanına köre, Yaltadaki «Hizb ut-Tahrir davasınıñ» eki mabüsi Arsen Cepparov ve Refat Alimov Rusiyeniñ Rostov-na-Donu şeerinden Aqmescitke avuştırıldı.
Qırımlı advokat Edem Semedlâyevniñ Qırım.Aqiqatqa bildirgenine köre, al-azırda jurnalistniñ aytqanlarını isbatlaycaq malümat yoq.
«Şimdilik tek öşek bar. «Aqmescit beşiniñ» çıqqanı zaten belli. Olar şimdi qayda, tasdıqlanğan bir malümat yoq. Kelip çıqtılarmı yoqmı bilmeyim. Bazarertesi künü SİZOğa baracam, bilecekmiz», – dedi Semedlâyev.
Dekabrniñ 6-nda belli oldı ki, Aqmescitteki «Hizb ut-Tahrir davasınıñ» mabüsleri Teymur ve Üzeir Abdullayevler, Ayder Saledinov, Rustem İsmailov ve Emil Cemadenov Rusiyeniñ Rostov-na-Donu SİZOsına avuştırıldı.
2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzeir Abdullayev, Teymur Abdullayev, Emil Cemadenov ve Ayder Saledinov tevqif etilgen edi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
