Yaltada suv tübünde qalğan evlerden üç yüzge yaqın insan tahliye etildi. Bunı işğal etilgen Yalta memuriyetiniñ başı Yanina Pavlenko bildirdi.
«Suv tübünde qalğan evlerden insanlarnı tahliye etmege devam etemiz, şimdilik 281 kişini tahliye ettik (olardan 49 bala). Belediye pansionatlarğa yerleştirdik. Qırımnıñ kurort ve turizm naziri Vadim Volçenkonıñ yardım ile bugün eñ çoq zarar körgen musafirhanelerden («Bristol» ve «Oreanda») turistlerni de tahliye ettik», – dep yazdı Pavlenko Facebook saifesinde.
İyünniñ 18-ne keçken gece, bol yağğan yağmurlar neticesinde Büyük Yaltanı suv bastı, şeerde cayav keçitleri suv astında qaldı. Yerli memurlar cemaat naqliyatınıñ qtanamasını toqtattı. Yaltada fevqulâde vaziyet ilân etildi, şeerge kiriş yeri qapalı.
Sağanaqlardan ve şeerniñ suv basqan soñ 80 transformator stantsiyası ve eki elektrik naqil hattısı elektriksiz qaldı. Krımenergonıñ haber etkenine köre, episi olıp 2700 istimalcı ışıqsız qalğan. Bundan ğayrı yerli memurlar bölgede suvnıñ kesilmesi aqqında qarar aldı ve şeer sakinlerini suv alıp qoymağa çağırdı.
Evel, Qırımnıñ Gidrometeorologik merkezinde haber etkenlerine köre, cumaaqşası gecesi yarımadanıñ şarqiy rayonlarında yağanaqlarnıñ aman-aman eki aylıq qararı yağğan.
