Yalta suv anbarlarınıñ suv yedegi eki ayğa qaldı, dep bildirdi yanvarniñ 25-nde Yaltanıñ Rusiye memuriyeti yolbaşçısı Yanina Pavlenko Qırımnıñ suv meseleleri toplaşuvında.
«Bugünki künde Yaltada suv 36 biñ 910 metr kub arttı, suv eki ayğa qaldı. Amma ilâve çoqraqlarımızdan suv kele. Hasta Baş uçansuvı 40 biñ kub, Massandra uçansuvı 5 metr kub, Mogabi gölü 1 biñ kub bere», – dep bildirdi Pavlenko.
Onıñ malümatına köre, Zagorsk suv anbarında şimdi 1 mln 843 biñ metr kub bar, 43 biñ kubı – faydalıdır, Sçastlivoye suv anbarında – 2 mln 648 biñ kub, 2 mln 046 biñ kubı – faydalıdır.
Pavlenko, yaltalılarnıñ 90%-ı gece-kündüz suv ala, dep işandıra.
Keçken afta Pavlenko suv anbarları yahşı tolmay ve «bu qasevetlendire», dep bildirgen edi. Şu sebepten Yaltada eski suv berüv cedveline qaytqanlar – saba ve aqşam üçer saat.
2020 senesi noyabrniñ 27-nden itibaren Yaltada gece suv berilüvi sıñırlandı. Daa soñra akimiyet bildirdi ki, Büyük Yaltağa suv bergen Zagorsk ve Sçastivoye suv anbarlarınıñ suv yedekleri eksilgeni içün keçken sene dekabrniñ 14-nden başlap şeerde ve qasabalarda suvnı saba ve aqşam üçer saat bermege qarar berildi. Dekabrniñ 17-nde Yalta sakinlerine suv Mogabi gölünden berilip başladı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
