Yalta şeeriniñ rusiyeli memuriyetiniñ başı Aleksey Çelpanov, şeer merkezinde ses seviyesini ölçemege Belediye nezareti bölügine, Rospotrebnadzor müessisesine ve polistsiyağa buyurdı. Bu aqta memuriyetniñ matbuat hızmeti bildirmekte.
"Teşkerüvni saba erte ya da aqşam keç keçirmeñiz, sesli reklamanıñ eñ gürültili vaqtını, adamlarğa keder etken vaqtını belgilep, o zaman keçiriñiz", - dedi Çelpanov.
O, iskelelerniñ yanında direklerde yerleşken dinamiklerni de baqıp çıqmağa buyurdı.
"Yalı boyu qoyulğan sesni küçleştirgen cihazlar içtimaiy reklamanı yayınlamalı, amma o anda yoq. Onıñ yerine daima ve yüksek sesnen ticariy reklama yañğıray", - dedi Çelpanov.
Memuriyet başınıñ aytqanına köre, şeerde ses vaziyeti deñişmese, memurlar "sesli cihazlarnı" alıp taşlamağa mecbur olacaq.
