Keçken afta Yaltada yağğan küçlü sağanaq ve selden soñ şeerde yüzden çoq soqaq zarar kördi. Bu aqta Yalta memuriyetiniñ Rusiye yolbaşçısı Yanina Pavlenko Facebook saifesinde yazdı.
«117 soqaq ciddiy zarar kördi, dep ayta bilemiz, tamir ve ğayrıdan quruv kerek olacaq», – dep ayttı Pavlenko. Onıñ qayd etkenine köre, mektepler ve bala bağçaları da zarar kördi.
Yanina Pavlenkonıñ aytqanına köre, 14 müessise zarar kördi: sekiz bala bağçası, beş mektep ve bir bala icat merkezi. Şeerde tertipke ketirüv işleri devam ete.
Onıñ bildirgenine köre, Alupkada İzergin soqağı ve Aqyar şossesi rayonlarında yalıdan çıqqan özenniñ taşqınına yol berilmedi. O, evlerni basa bilir edi.
Yaltada sel aqibetleri yoq etilgeni içün bir sıra soqaqnıñ keçiti qapatıldı.
Yaltada ve şarqiy Qırımda keçken afta Qırımda olğan furtuna aqibetlerinen küreşmege devam eteler. Qırımnıñ Rusiye yolbaşçısı Sergey Aksenov salı ve çarşenbe Yaltada raatlıq künleri olacaq, dep bildirdi.
Qırımnıñ Rusiye fevqulâde vaziyetler nazirligi idaresi bildirgenine köre, 2021 senesi iyünniñ 16-ndan 18-ne qadar küçlü yağanaqlar neticesinde 426 azbar, 356 ev, 18 içtimaiy ceetten müim obyektni suv bastı. İyünniñ 22-nde saba, Qırım qurtarıcılarınıñ malümatına köre, Yalta ve Yedi Quyu rayonında 37 ev suvda qala. Umumen suv basqan yerlerden 1783 insan tahliye etildi.
Akimiyet Qırımnıñ yedek fondundan 161 mln 160 biñ ruble yarımadadaki fevqulâde vaziyet aqibetlerini yoq etmek içün sarf etmege qarar berdi.
Rusiye prezidenti Vladimir Putin Qırımğa afat aqibetlerini yoq etmek içün «acele ve büyük» yardım köstermege emir etti.
İyünniñ 22-nde Qırımda bazı yerlerde pek küçlü yağmur, boranlı yağmur, burçaq yağması beklenile, yel süratı saniyede 15-20 metr esecek.
