Avgustnıñ 22-sinde Yaltada Lenin eykeli yanında Rusiye devlet bayrağına bağışlanğan aktsiyanı keçirdiler.
Aktsiyada Yaltanıñ bala sport taqımları iştirak etti, dep bildire Qırım.Aqiqat mühbiri.
Sport taqımlarınıñ iştirakçilerim Rusiye bayrağınıñ renklerinde olğan timsalâtnen oyun fleşmobınen çıqışta bulundı. "Yunarmiya" Rusiye vatanperver bala areketiniñ azaları ve Yalta küreş mektebiniñ sportçuları, 10 metrlik bayraqnı yaydı.
Aktsiya soñunda Rusiye bayrağınıñ renklerinde üfüriklerni avağa uçurttılar, bayramnıñ kence iştirakçılerini bedava buzqaymaqnen sıyladılar.
Qomşu Rusiyeniñ mudafaa nazirligi Kremlniñ kontroli altında bulunğan Qırım akimiyet organlarınen birlikte yarımadada «Yunarmiya» Rusiye arbiy-patriotik areketiniñ şubesini meydanğa ketirdi.
Ukraina aq-uquq qoruyıcıları ilhaq etilgen Qırımda balalarnıñ terbiyelev formatınıñ arbiyleştirilgenine defalarca diqqat çektiler. Ruhiyatçılar zemaneviy Rusiyeniñ tasilinde balalarnıñ şuurına tazyıq etilgenini qayd eteler.
2015 senesiniñ başında Rusiyeniñ Qırım akimiyeti yarımadada «federal universitet»niñ meydanğa ketirilmesini buyurdı. Oña bir qaç aliy oquv yurtu ve bu cümleden yoq etilgen Vernadskiy adına Tavriya milliy universiteti, Georgiyevskiy adına Qırım devlet tıbbiyet universiteti ve bir qaç diger ilmiy muessise kirdi. «Qırım federal universiteti»niñ strukturasına 13 umum tasil ve ilmiy muessise kire.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
