Yaltada cumaaqşamı künü, oktâbrniñ 11-nde, arbiy kinooperator ve kinovesiqacısı Kenan Kutub-zadeniñ hatıra tahtası tantanalı sürette açıldı. Qırım.Aqiqat mühbiri bildire ki, tahta kinorejissöri icadiy yolunı başlağan Yalta kinostudiyasınıñ binasında tiklendi.
«Kenan Kutub-zade cebe kinooperatorı olaraq 1945 senesi «Osvobojdeniye. Osventsim» filmini çıqarıp, dünya kinosanatınıñ tarihına kirdi. Onıñ levhaları natsist cinayetçiler qabaatlanğan Nürnberg esnasında qullanılğan edi», – dep tarif etti hatıra tahtasını tiklemek teşebbüsçilerinden biri İbraim Voyennıy.
Onıñ qayd etkenine köre, 40 yıl çalışqan Kenan Kutub-zade tahminen 40 levhanı azırlağan edi.
Tedbirge Qırımnıñ farqlı regionlarından bir qaç on insan keldi. Qırımğa kinooperatorınıñ Moskvada yaşağan balaları da keldi.
«Hatıra tahtasını tiklegeniñiz içün sizge minnetdarım, aytqanlarıñız içün minnetdarım. Bu acayip bir tahta ve qırımtatar halqınıñ namusı ve itibarı oğrundaki küreşniñ bir parçasıdır», – dep ayttı Kenan Kutub-zadeniñ oğlu İsmet Kutub-zade.
Toplaşqanlar efsaneviy kinooperatornıñ hatırasına dua oqudı, hatıra tahtasına çeçekler qoydı. Tahtanı Qırım eykeltraşı Ayder Aliyev yaptı.
