Link açıqlığı

Yaltada gimnaziya ocalarını Ukraina gimni içün vazifeden boşatmamaq vade ettiler


Soñki çañ bayramında mezunlar tarafından Ukraina gimni icra etilgen Yaltanıñ №15 ukrain «mektep-gimnaziyası»nıñ müdiri ve ocalarına nisbeten basım kösterilmedi.

Bunı Yalta tasil idaresiniñ yolbaşçısı Valentina Kabanova bildirdi, dep haber ete Tsentr jurnalistskih rassledovaniy.

Kabanovanıñ sözlerine köre, işbu mektepte gimnniñ iсra etilüvinden soñ ocalarnı işten boşatmağa istegenleri aqqında malümat aqiqatqa uymay eken.

«Resmiy şekilde aytam, bu malümat yañlıştır. Ne talebelerge, ne zenaatdaşlarğa ve mektep hadimlerine iç bir basım kösterilmedi, bu doğrudan-doğru bir kimseniñ tarafından uydurılıp çıqarılğan malümattır. Nasıl basım, hususan mezunlarğa basım ola bilirmi?», – dedi o.

№15 ukrain «mektep-gimnaziya-bala bağçasınıñ» hayriye inkişaf fondınıñ şurası başı Leonid Yakimiv de bu malümatnı red ete. Onıñ sözlerine köre, soñki çañ bayramında Ukraina gimnini icra etmege yalıñız talebelerniñ teşebbüsi edi.

«Ebet, nasıldır bir qasevtni doğurdı. Tasil idare yolbaşçısı da meraqlandı. Mahsus degil, elbette, çağırdı, bazı iş sualleri edi, o soradı, işte. Añlatuv arizalarnı kimse yazmadı, ne talebe, ne mezunlar»,– dedi Leonid Yakimiv.

Bunıñ ile beraber şusı da qayd etile ki, Yalta ukrain mektebiniñ müdiri ve ocaları ile subetleşmege imkân olmadı. Mektepte bulunğan ocalar matbuat vastalarınıñ temsilcileri ile subetleşmege razı olmadı.

Hatırlatamız, Yaltada şeer mekteplerinden birisinde mezunlar soñki çañ bayramında Ukraina gimnini icra ettiler. Rusiye gimni yañğırağanda, talebeler ellerini bağrına basıp, Ukraina gimnini icra ettiler. Olarnıñ çıqışını elçırpmalar ile alğışladılar.

Telebelerni bu sebepten añlatuv arizalarnı yazmağa mecbur eteler. Bunı mektepniñ mezunlarından birisi bildirdi.
XS
SM
MD
LG