Martnıñ 8-nde Yaltada qaza sebebinden bazı adresler boyunca suvnıñ qısmen kesilmesi ola bile, dep haber ete Vodokanal YUBK.
«Qaza-tamir işler sebebinden martnıñ 8-nde kündüz saat 3:30tan aqşam saat 6-ğace Baturina, Vinogradarâ soqaqları ve Yunosti aralığında suvuq suvnıñ qısmen kesilmesi ola bile», – dep yazıla bildirmede
Martnıñ 3-nden Yaltada suv kene cedvel boyunca saba ve aqşam üçer saat berilip başlandı.
Evel, Yaltanıñ Rusiye memuriyetiniñ reis muavini Vladimir Burâk, yerli çoqraqlar biraz tolğanına baqmadan, şeerde suv anbarlarından suvnı almamağa tırışalar, dep haber etti.
Qırımnıñ bazı mesken yerlerinde tamir işleri sebebinden martnıñ 6-nda suv keçsile bile. Bunı «Vodokanal Krıma» müessiseniñ matbuat hızmeti haber ete.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
