Yaltada yanvarniñ 14-nden fevralniñ 2-ne qadar 950 sakin yañı koronavirus yuqunçına qarşı «Sputnik V» Rusiye aşısını yaptırdı, dep haber ete Kreml kontrolindeki şeer memuriyetiniñ matbuat hızmeti.
Qayd etilgenine köre, 50 kişi – Yaltanıñ Rusiye şeer memuriyetiniñ hadimleridir.
«Eali polikliniklerde aşı ola. Yaltalılar qısqa müddet içinde koronavirus yuqunçından qorunsın dep, şeer poliklinikasınıñ iş vaqtı arttırıldı ve insanlar raatlıq künleri bir 08:00-dan 20:00-ğa qadar qabul etile», – dep bildire şeer memuriyetiniñ sağlıq müessiseleri ile işbirligi sektorınıñ müdiri Natalya Berezovskayanıñ aytqanlarını matbuat hızmeti.
Yalta akimiyeti Alupka ve Gurzufta da aşı yapmağa planlaştıra.
«Şimdi anda aşı saqlamaq içün kerekli şaraitler yaratıla», – dep aytıla haberde.
Yanvar ayında Qırımdaki akimiyet işğal etilgen yarımadada 6152 insanğa Rusiye aşısı yapıldı, dep bildirdi.
Qırım akimiyeti yarımada sakinlerine COVID-19 «Sputnik V» Rusiye aşısını yaptırmağa teklif ete. Qırımnıñ Sağlıq nazirligi qayd etti ki, aşı «istekke köre» eki etapnen yapıla. Qırımnıñ Rusiye ükümetiniñ baş nazir muavini Yelena Romanovskaya Rusiyeniñ koronavirus aşısı kimlerge yapılmaycağı aqqında tarif etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
