Yaltada kötere mal anbarında 22 kilogramm Avropa qaşqavalını taptılar. Bunı Rosselhoznadzor müessisesiniñ matbuat hızmeti bildire.
Beyanatqa köre, olarnıñ arasında - Rusiye ve ilhaq etilgen Qırımda satmaq yasaq olğan "Dorblu", "Camembert" ve "Brie" qaşqavallarıdır.
"Mahsulat saipleri kerekli sertifikatlarnı kösterip olamadı, sarğılıqta ise rus tilinde markirovka yoq edi. Yasaq etilgen malnı tutıp aldılar ve yoq ettiler", - dep qoştılar müessisede.
Daa evel Rosselhoznadzor Aqyar ve Kezlev tükânlarında Rusiye ve ilhaq etilgen Qırımğa ketirilmesi yasaq olğan qaşqavallarnı tapqan edi.
Keçken yıl Rusiye prezidenti Vladimir Putin, Qırım ilhaqından soñ sanktsiya kirsetken memleketlerge qarşı embargonı uzattı. Qara cedvelge Avropa Birliginiñ memleketleri, AQŞ, Kanada, Avstraliya, Norvegiya, Arnavutlıq (Albaniya), Montenegro, İslandiya ve Lihtenşteyn kirdi. Keççe anda Ukrainanı da qoştılar.
