Yaltada suv basuvından zarar körgenlerniñ sayısı 55-ten 58-ge qadar arttı, bir kişi elâk oldı. Bu aqta Moskva kontrolindeki Yalta memuriyetiniñ yolbaşçısı Yanina Pavlenko «Rossiya 24» yayınında ayttı.
«58 kişi zarar kördik, aman-aman episiniñ zararı yengil, er keske yardım kösterildi. Altısı hastahanege alındı, amma bugünge qadar dördü hastahaneden yiberildi», – dep bildire Pavlenkonıñ aytqanlarını TASS.
Onıñ qayd etkenine köre, iyünniñ 18-nden berli ğayıp olğan kişi olaraq sayılğan qadın qıdırıla.
Yaltanıñ Rusiye memuriyetiniñ yolbaşçısı Yanina Pavlenko suv basuvı vaqtında ğayıp olğan qadınnı sağ tapmaq ihtimali kün-künden eksile, dep bildirdi.
Qırımnıñ Rusiye fevqulâde vaziyetler nazirligi idaresi bildirgenine köre, 2021 senesi iyünniñ 16-ndan 18-ne qadar küçlü yağanaqlar neticesinde 426 azbar, 356 ev, 18 içtimaiy ceetten müim obyektni suv bastı. İyünniñ 22-nde saba, Qırım qurtarıcılarınıñ malümatına köre, Yalta ve Yedi Quyu rayonında 37 ev suvda qala. Umumen suv basqan yerlerden 1783 insan tahliye etildi.
Akimiyet Qırımnıñ yedek fondundan 161 mln 160 biñ ruble yarımadadaki fevqulâde vaziyet aqibetlerini yoq etmek içün sarf etmege qarar berdi.
Rusiye prezidenti Vladimir Putin Qırımğa afat aqibetlerini yoq etmek içün «acele ve büyük» yardım köstermege emir etti.
