Yaltada martnıñ 16-nda Rusiyeniñ Qırım işğaliniñ yıllığı munasebetinen şeerniñ yalısında parad keçirildi. Arbiy urbada balalar qazaq ve «halq opolçenleriniñ» vekillerinen beraber 20 metrlik Rusiye bayrağını taşıdı.
Yürüşte Kreml kontrolindeki Qırım parlamentiniñ reisi Vladimir Konstantinov ve Yalta akimiyeti iştirak etkenler. Bundan ğayrı, parad ve mitingde Frenkistan parlamentiniñ sabıq deputatı Tyerri Mariani iştirak etti.
Miting yekünlengen soñ Yaltanıñ gençlik teşkilâtları fleşmob taqdim etip, «halq opolçenleriniñ» temsilcilerini ve «yeşil adamçıqlar» urbasına kiyingen küçük silânen arbiy-vatanperver klubınıñ gençlerini celp etti.
Bayram yeri qoralarnen qapatılmadı ve maden qıdırıcılar qoyulmadı. Lâkin baş sana etrafında Rusiye gvardiyası nevbetçilik yaptı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
