Link açıqlığı

Saatnıñ esas haberi

Yalta: selden soñ onlarnen ev ve daire tamir etilmeycek alda


Yalta, 2021 senesi iyünniñ 22-si, nümüneviy resim
Yalta, 2021 senesi iyünniñ 22-si, nümüneviy resim

Yaltada yigirmiden çoq daire ve ev selden soñ ğayrıdan tiklenilmeycek dep tanıldı. Evleri bütünley tamir etilmesi kerek olğan 70 zarar körgen kişiniñ arizası keldi.

Yaltada yigirmiden çoq daire ve ev selden soñ ğayrıdan tiklenilmeycek dep tanıldı. Evleri bütünley tamir etilmesi kerek olğan 70 zarar körgen kişiniñ arizası keldi. Bu aqta Moskva kontrolindeki Yalta yolbaşçısı Yanina Pavlenko «Rossiya 24» telekanalı yayınında ayttı.

«Zarar körgenlerden 700-den çoq ariza keldi. Bugünge qadar 71 ev ve daire tamamen yoq etilgen dep tanıldı. Yani birinciden bu insanlarnı tüşünmemiz kerek, olar vaqtınca yerleşüv noqtalarında qala. Bugün böyle noqtalarda 38 insan yaşay», – dep bildire Pavlenkonıñ aytqanlarını «Krıminform».

Yanina Pavlenkonıñ aytqanına köre, daa tahminen 650 insan körgen zararları içün tazminat ala, 255 kişi mülkini bütünley coydı, 140 insan – qısmen.

Onıñ malümatına köre, zarar körgen maşinalarnen bağlı 108 muracaat keldi, 82 ariza iş adamlarından keldi.

Yaltanıñ Rusiye memuriyetiniñ yolbaşçısı Yanina Pavlenko şeerde yañı suv basuvları ve sel beklenile, dep bildirip, sakinlerni tahliyege azır olmağa çıqardı.

Sinoptiklerniñ malümatına köre, iyünniñ 28-nde Yaltada yağmur yağması beklenile. Şimaliy-ğarbiy yel saniyede 7-12 metr esecek. Ava arareti gece 18…20°, kündüz 26…28° olacaq.

Qırımdaki Rusiye Fevqulâde vaziyetler nazirligi iyünniñ 27-nde üyleden soñ ve iyünniñ 28-nde kün devamında yarımadanıñ bazı özenlerinde suv seviyesi 0,1-1,5 metr köterilecek, sel havuzlarında sel telükesi bar, dep tenbiledi.

Yaltada iyünniñ 26-nda bir buçuq saat içinde bir aylıq yağanaqlar yağdı.

Pavlenko Facebook saifesinde iyünniñ 26-nda saba selden zarar körgen Yaltada kene yağmurlar yağdı, dep bildirdi.

Akimiyet Qırımnıñ yedek fondundan 161 mln 160 biñ ruble yarımadadaki fevqulâde vaziyet aqibetlerini yoq etmek içün sarf etmege qarar berdi.

Rusiye prezidenti Vladimir Putin Qırımğa afat aqibetlerini yoq etmek içün «acele ve büyük» yardım köstermege emir etti.

XS
SM
MD
LG