Yaltada Rusiye quvetçileri 56 yaşındaki yerli sakinni yaqaladı ve RF ordusını itibardan tüşürüv içün oña qarşı memuriy protokol tizdi. Bunıñ aqqında Rusiye ve Qırım haber vastaları haber ete.
Rusiye quvetçileriniñ iddia etkeni kibi, erkek natsist şiarlarını qıçırıp buña ait ima-işaretler köstergen. Rusiye mahkemesi onı qabaatlı tanıdı ve 14 künge ve 40 biñ ruble para cezasına mahküm etti.
Sentâbrniñ 18-nde Rusiyeni desteklegen bloger Aleksandr Talipovnıñ telegram kanalında bir video yanınlanğan edi. Videoda bir erkek Yalta yalısında Rusiye arbiyleriniñ peşinden "hayl Gitler" ve soñra daa "Şan olsun Ukrayinağa" dep qıçıra.
Evel "Qırım esnası" uquq qoruyıcı teşkilâtı Rusiyeniñ Ukrayinağa qarşı büyük cenki başlanğandan berli "Rusiye ordusını itibardan tüşürüv" madesi ile 472 protokol tizilgenini bildirgen edi.
Rusiyede ve işğal etilgen topraqlarda Ukrayinanı desteklegen faallerniñ taqip etilmesi devam ete. Rusiyege qoltutqan bloger Aleksandr Talipov Telegram kanalında Ukrayına tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını "itibardan tüşürgeninde" qabaatlanıp, memuriy ve cinaiy mesüliyetke çekile. Ukrayına prokuraturası Talipovğa qarşı "milletlerara nefret doğuruv" maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
