Yaltada Rusiye ordusına seferber etilgenlerniñ «ilk gruppası» ozğarıldı, dep bildirdi Yaltanıñ Rusiye yolbaşçısı Yanina Pavlenko Telegram kanalında.
«İmayecilerimizniñ tuvğanları ve yaqınlarından bağ malümatını alıp, çat yaptıq, haber paylaşıp, bir-birimizge qoltutacaqmız», – dep bildirdi Pavlenko.
O, Rusiye ordusına seferber etilecek Yalta sakinleriniñ sayısını aydınlatmadı.
Sentâbrniñ 21-nde Rusiyede ilân etilgen qısmiy seferberlik sebebinden Qırım ve Aqyarnıñ Rusiye akimiyeti askerlikke aluv komissiyalarını quruv aqqında bildirdi. Sergey Aksenov esas Ukrayınağa 1200 «göñüllini» yolladı ve daa eki batalyon azırlay, dep bildirdi.
Aq qorçalayıcılarnıñ malümatına köre, sentâbrniñ 21-nden işğal etilgen Qırımnıñ tahminen 5000 sakini celpname aldı. Seferber etilgenler Kefe, Keriç, Qırımnıñ Yedi Quyu rayonlarına yollanıla.
Qırım ve Aqyarda Rusiyeniñ Ukrayınağa qarşı cenkinde ölgen Rusiye arbiylerini defin etmege devam eteler. Aqyarnıñ Rusiye yolbaşçısı Mihail Razvojayevniñ Telegram kanalında bildirgenine köre, fevralniñ 24-nden Aqyarda 49 Rusiye arbiyi kömüldi. Qırımda elâk olğan Rusiye arbiyleriniñ sayısı aytılmay. Cenazeler Aluşta, Sudaq, Saq, Keriç ve Yaltada keçti.
Ukrayına prokuraturasınıñ malümatına köre, 2015 senesinden başlap Rusiye Qırımda Rusiye Federatsiyasınıñ silâlı quvetlerine askerlikke aluv qanunsız kampaniyasını 15 kere keçirdi. Aq qorçalayıcılar Qırım ve Aqyar sakinleriniñ Rusiye ordusına aluvını halqara uquq bozuluvı dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
