Rusiye nezaretinde olğan “Zapovednıy Krım” müessisesi, Yaltadaki dağ-orman qoruğında tereklerniñ kesilvine dair içtimaiy ağlardaki beyanatlarğa cevap berdi. İdarede inandıralar ki, tereklerni qoruq tışında keseler.
“Fotoda tasvir etilgen kesüv “Çernomorneftegaz” gaz borusınıñ töşelmesinen bağlı, ğayet qorulğan “Yalta dağ-orman” tabiat territoriyası tışında, yani qoruqnıñ tışında”, – yazıla malümatta.
Daa, “Yalta-Foros-Aqyar” gaz borusınıñ quruluvı yüz biñlerce Qırım sakininiñ çoq yıllıq meselesini çezecek, dep qayd etile.
Gaz borusı bütün Ay-Petri yaylâsından Beş-Teknege qadar keçe ve gaz ayırıcı stantsıyası qırulıcaq yerden Veselovsk ayırılğan yerge tüşe.
Bu gaz borusınıñ quruluvı aqqında “Çernomornaftogaz”nıñ taze malümatı yoq.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
