Rusiyeniñ Samara şeeri Leninskiy rayonınıñ prokurorı Aleksey Rodivilovnı Yaltağa prokuratura başı vazifesine keçirdiler. Bunı Rusiye nezaretindeki Qırım prokuraturasıniñ matbuat hızmeti bildirdi.
Derc etilgen malümatqa köre, Rodivilov 43 yaşında, o 2000-inci yıldan berli Rusiye prokuraturasında çalışmaqta, amma onıñ bütün işi yalıñız Samara ve Samara vilâyeti ile bağlı edi, o anda prokuratura tahqiqatçısı olıp çalışıp başladı.
2017-nci yılı Rusiye baş prokurorı Yuriy Çayka Kefede ve Bağçasaray rayonında yañı prokurorlarnı tayin etti. Olarnıñ ekisi de qomşu Rusiyeden yollanıldı. Kefe prokurorı - Zabaykalyeden, Bağçasaray prokurorı ise Krasnodardan keldi.
