Qırımnıñ Rusiye akimiyeti tarafından «VKontakte» içtimaiy ağında paylaşqanları içün nefret ve duşmanlıq doğurğanında qabaatlanğan Yalta sakini Elina Mamedovanıñ dairesinde noyabrniñ 28-nde tintüv keçirildi, dep haber ete Qırım.Aqiqat mühbiri.
Tahqiqat tedbirleri saat 19:30-da başladı. Tintüvni tahqiqatçı Gayfulin yolbaşçılığında üç kişi keçirdi, olarnen beraber kelgen eki şaat bar edi. Elina «VKontakte» içtimaiy ağında malümatnı paylaşqanda qullanğan bilgisayarnı qıdırdılar.
«Mahkeme qararını oqudılar, bizge onı baqmağa bermediler. Qararda tahqiqatçınıñ soyadı bar edi – Osokin, amma tintüvni başqa insan keçirdi. Bilgisayar tapılmadı, çünki bozuldı, bunı birinci tintüv vaqtında aytqan edim. Neticede tiş fırçımnı alıp kettiler – qararda DNK testi içün şahsiy bir şey kerek, denile», – dep tarif etti Mamedova.
Elinanıñ aytqanına köre, «uquq qoruyıcılarnıñ yañı eglencesi – er yarım yıl evimde tintüv keçirmek».
Bu sene iyünniñ 13-nde Rusiye FSBsi hadimleri Elina Mamedovanı Autka (Çehovo, Yalta) köyündeki evini tintken soñ tuttılar. Rusiye Tahqiqat komitetinde olğan sorğudan soñ onı yiberdiler.
Mamedovağa qarşı Rusiye Ceza kodeksiniñ 282-nci maddesiniñ 1-inci qısmı boyunca «VKontakte» içtimaiy ağında 2014 ve 2015 seneleri paylaşqanları içün cinaiy iş açıldı.
Noyabrniñ 15-nde Rusiye Devlet dumasınıñ deputatları paylaşuv içün cinaiy mesüliyetni lâğu etecek qanun leyhasını birinci oquvda qabul etti. Bu sene iyünniñ 7-nde olğan canlı yayında Rusiye prezidenti Vladimir Putin bunıñ kibi areketler içün cezalar «marazm ve absurd» olmamalı, dedi.
