Yalta "Hizb ut-Tahrir davası" boyunca mahkeme oturışında advokat Edem Semedlâyev, dava malümatından vesiqa ğayıp olğanını kördi. Bunı o, Qırım.Aqiqat mühbirine aytıp berdi.
"Bu vesiqa, tahqiqatçı Sergey Mahnevniñ tilşınas eksperti Yelena Hazimullinağa mektübidir. Onda müşterilerimizniñ subet stennogramması bar, onıñ esasında qabaatlav tarafı ekspertiza yapıp, olar (dava iştirakçileri - QA) "terrorcılıq faaliyetinen bağlı", dep qarar çıqarı", - dedi advokat.
Semedlâyev, dava malümatınıñ ögrenilmesi vaqtında bu mektüp yoq olğanı belli oldı. Advokat, o vesiqa, stennogramma protsesual yolunen yapılmağanını tasdıqlay edi, dep añlata.
Aprel 4-ünde Rostov-na-Donu şeeriniñ Şimaliy Kavkaz arbiy mahkemesi Yalta "Hizb ut-Tahrir davası"nı ekinci sefer baqıp başlağanı bildirile edi.
Bu dava boyunca qabaatlanğan Arsen Cepparov, Refat Alimov, Emir-Usein Kuku, Müslim Aliyev, İnver Bekirov ve Vadim Siruk 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy firqasına alâqaları bar olğanında qabaatlaylar.
Ukraina Tış işler nazirligi Rusiyeden Yaltadaki «Hizb ut-Tahrir davasınıñ» mabüslerini azat etmesini talap ete.
