Yalta "Hizb ut-Tahrir davası" boyunca mahkemede, imaye tarafınıñ eksperti Dmitriy Dubrovskiy, Yelena Hazimulina, Timur Urazmetov, Yuliya Fomina ve Yuliya Oşeyevanıñ tilşınaslıq ve dinşınaslıq ekspertizasını tenqit etti. Bunı Qırım.Aqiqatqa advokat Emil Kurtbedinov aytıp berdi.
Oña köre, sorğu vaqtında Dubrovskiy, ekspertlerniñ yekünleri talaplarğa uymay, dep ayttı.
"O, qabaatlav tarafı ekspertleriniñ işiniñ qiymetini kese edi. Dmitriy Dubrovskiy, vesiqalarda çarpıq dialoglar ve añlav deñiştirüvlerini tapqanını añlatıp, aytıp berdi. Bundan ğayrı, onıñ aytqanına köre, tilşınaslıq mütehassısları nasıldır diniy ıstılalarğa qıymet kese edi. Ekspertniñ fikrince, dinşınas öz işini becermedi, tilşınaslar ise, aksine, özüne dinşınaslıq vazifesini aldı", - dep tefsir etti Kurbedinov.
Bu dava boyunca nevbetteki mahkeme oturışı sentâbr 30-ında keçirilecek, onıñ devamında, dava iştirakçileriniñ video faylları ve tutılıp alınğan şeylerniñ baqıluvında olğan şaatlarnı sorğulacaqlar.
Aprelniñ 4-nde haber etilgeni kibi, Rostov-na-Donu şeeriniñ Şimaliy-Kavkaz okrugınıñ arbiy mahkemesi Yaltadaki «Hizb ut-Tahrir davasını» ekinci kere temelden baqmağa başladı.
Bu dava boyunca qabaatlanğan Arsen Cepparov, Refat Alimov, Emir-Usein Kuku, Müslim Aliyev, İnver Bekirov ve Vadim Siruk 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy firqasına alâqaları bar olğanında qabaatlaylar.
Ukraina Tış işler nazirligi Rusiyeden Yaltadaki «Hizb ut-Tahrir davasınıñ» mabüslerini azat etmesini talap ete.
