Yaltada Qırımda iyülniñ 3-nden 5-ne qadar ilân etilgen furtuna ihtarı sebebinlen fevqulâde vaziyetler ştabını toplaylar. Bu aqta şeerniñ Rusiye memuriyetiniñ yolbaşçısı Yanina Pavlenko bildirdi.
«Bugün saat beşte fevqulâde vaziyetler komissiyası kene toplana, yaqınlaşqan furtunağa azırlıq planını azırlaymız. Büyük Yaltanıñ «tar yerlerini» bilemiz. Anda tehnika ve insanlarnı yerleştirecekmiz. Daa bir künümiz bar», – dedi Pavlenko.
Viran olğan soqaqlar ve çoplük altında maşinalar: Yaltada yüz bergen tabiat afetiniñ zararı (fotogalereya)
Hatırlatamız, Qırımnıñ Rusiye Fevqulâde vaziyetler idaresi iyülniñ 3-nden 5-ne qadar yarımadada küçlü sağanaq, boranlı yağmur yağacaq ve küçlü ruzgâr esecek, dep bekley.
Qırım Gidromettsentr yolbaşçısı Tatyana Lübetskaya iyülniñ 3-nde Qırımğa yağmur ketirecek daa bir tsiklon olacaq, dep bildirdi.
Qırımnıñ Rusiye fevqulâde vaziyetler nazirligi idaresi bildirgenine köre, 2021 senesi iyünniñ 16-ndan 18-ne qadar küçlü yağanaqlar neticesinde 426 azbar, 356 ev, 18 içtimaiy ceetten müim obyektni suv bastı. İyünniñ 22-nde saba, Qırım qurtarıcılarınıñ malümatına köre, Yalta ve Yedi Quyu rayonında 37 ev suvda qala. Umumen suv basqan yerlerden 1783 insan tahliye etildi.
Qırımnıñ Rusiye ükümetiniñ yolbaşçısı Yuriy Gotsanük iyünniñ 25-nde Fevqulâde vaziyetler komissiyasınıñ toplaşuvında Qırımda selden kelgen zarar 200 million rubleden çoq oldı, dep bildirdi.
Akimiyet Qırımnıñ yedek fondundan 161 mln 160 biñ ruble yarımadadaki fevqulâde vaziyet aqibetlerini yoq etmek içün sarf etmege qarar berdi.