Rusiye tahqiqatınıñ malümatına köre, qabaatlanğan adam, «mahsus arbiy operatsiyağa» (Rusiye akimiyeti Ukrayinanen cenkni böyle adlandıra – QA) qarşı çıqıp, 2022 senesiniñ soñunda Ukrayina Havfsızlıq hızmetiniñ vekillerinen bağ qurdı.
«2024 senesi mart ayında reberlerinden bir vazife aldı, patlayıcı cihaznı ve ayrı parçalarını tapıp, gizli yerge qoymaq kerek edi», – dep bildirdi Rusiye prokuraturası.
Qabaatlanğan kişi patlayıcı cihazlarnı qullanuv temellerini incelep, elnen yapılğan patlayıcı cihazlarnı alıp saqlağan ve yerini Ukrayina telükesizlik hızmetiniñ hadimine bildirgen eken.
Soñra, aytılğanına köre, FSB hadimleri tarafından tutuldı.
Qabaatlanğan kişi ya da imayesiniñ izaatları yoq.
Bundan evel Qırımdaki Rusiye mahkemesi Ukrayina istihbaratınen işbirligi yapqan Yalta sakinini mahkeme etecek, dep haber etildi. Berilgen malümatqa köre, 2023 senesiniñ soñunda mabüs RF Silâlı quvetleriniñ yerlerini fotoresimge çıqarğan ve «sızğan» eken.
Aq qorçalayıcılarnıñ tahminlerine köre, Rusiye uquq qoruyıcıları tarafından açılğan devlet hainligi, işbirligi ve casuslıq maddelerine istinaden davalarnıñ sayısı, belki de, bir qaç qat artar. Şimdi FSB böyle davalarnı aman-aman er kün başlata, 2014 senesine qadar olarnıñ sayısı yılda 10-dan ziyade olmay edi. Ukrayinağa qarşı büyük ücüm başlağan soñ Rusiyede devlet hainligi maddesi cenkke qarşı çıqqanlar içün eñ populâr maddelerden biri oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
