Ruisye nezaretindeki Yalta akimiyeti, turistler aqıntısı 15%-ğa artar, dep ümüt ete. Bu aqta şeerniñ rusiyeli memuriyetiniñ matbuat hızmeti bildirmekte.
"Yılnıñ başından berli Yalta bölgesine, şahsiy sektorlarda raatlanğanlarnı saymasaq, turistlerniñ umumiy sayısı 176 biñ adam oldı. Keçken yılğa köre, bu 12%-ğa çoqçadır. 2018 senesine köre, turistlerniñ sayısı 15%-ğa artar, dep bekleymiz", - dep yaza şeerniñ rusiyeli başı Aleksey Çelpanovnıñ sözlerinden matbuat hızmeti.
Turistlerniñ sayısı, "Yaltada meraqlı merasimler ve festivaller keçirilgeni" içün arttı, dep saya Çelpanov. Yalta başı, yaz başında yekünlengen "Bospor padişalığınıñ altın yüzügi" festivalini, misal olaraq ketirdi.
Rusiye nezaretindeki Aqyar akimiyeti, keçken yılğa köre, bu yıl Aqyarda turistlerniñ sayısı 23%-ğa arttı, dep bildirgen edi.
Qırımnıñ rusiyeli Kurort ve turizm nazirleginde, yılnın başından yarımadanı 2 milliondan çoq turist ziyaret etti, dep bildirgen ediler.
Qırımdaki Rusiye kurort nazirliginiñ bildirgenine köre, 2018 senesi ilhaq etilgen yarımada 6,8 mln turistni qabul etti, bu raqam 2017 senesinde olğan turistlerden aman-aman üç qat ziyadedir. Nazirlikniñ malümatına köre, olardan yarım millionğa yaqın kişi Ukraina vatandaşı edi. Ukraina Devlet sıñır hızmeti Qırımnıñ memuriy sıñırından keçken yolcularnıñ sayısına esaslanıp, bu malümatnı inkâr etti.
