Rusiye nezaretindeki Yaltanıñ başı İvan İmgrunt, Qırımnıñ rusiyeli başı Sergey Aksönovnıñ buyruğı ole Yalta avto vokzalınıñ rekonstruktsiyasına 100 million (1,5 million dollar) ruble ayırılması aqqında qarar alınğanını bildirdi.
Haber şeer memuriyetiniñ saytında derc etildi.
İmgrunt haber etkeni kibi, rekonstruktsiyadan ğayrı, vokzalnıñ terrorcılıqqa qarşı sisteması başqadan yapılacaq.
"Adamlar daima şikâyet etken avtovokzal etrafındaki qoralar aqqında laf yürsetile. Şimdi, teşebbüsimiz ile, olarnıñ yerleşme shemsı başqadan baqılacaq. Mütehassıslarda müsbet neticelerni alsaq, shema deñiştirilecek", - dedi şeerniñ rusiyeli başı.
Yanvarniñ 28-inde Yaltanıñ rusiyeli memuriyeti başınıñ yardımcısı Maksim Dvoretskiy, fevralniñ ekinci dekadasında bütün plâj alanlarnıñ planlaştırılğan teşkerüvi başlanacağını haber etti. Qabul etilgen abadanlaştıruv qaidelerine köre, mayısnıñ 1-ine qadar bütün tamir işleri, boyalav, yalı kenarınıñ abadalaştıruvı yekünlenmeli.
