Qırımtatar Milliy Meclisiniñ reisi Refat Çubarov Qırımnıñ sabıq Rusiye prokurorı Natalya Poklonskayanıñ bir qaç vatandaşlığı bar olğanına dair laflarını red etti. Bu aqta Çubarov Qırım.Aqiqat Radiosınıñ yayınında ayttı.
«Elbette, Ukraina vatandaşım ve 1991 senesinden soñ tek Ukraina vatandaşlığım bar. Elbette, meni Qırımdan çıqarmağa aqları yoq edi, çünki Rusiyege kiriş yasağı ukrain yarımadasına qarşı qanunğa uymay edi. Amma Rusiye qanunlarını bir daqqa talil etsek bile, olarnıñ qanunlarına köre Qırım parlamentiniñ deputatı olğan edim – demek ki, ayrı mahkemesiz mahkemege celp etmege ya da memuriy tedbirlerni kirsetmege aqları yoq edi. Ukraina vatandaşlarına qarşı repressiya yapmağa kerek olsa, olar öz qanunlarına bile qulaq asmaylar. Amma şimdilik adliye yetip olamağan cinayetçi ile yapılğan intervyü bunı yahşı köstere: Poklonskaya istegenini ayta bile, iftira atılğan insanlar ise özüni aqlamağa mecbur», – dedi o.
Çubarovnıñ qayd etkenine köre, intervyü vaqtında Poklonskaya «yalan aytıp, iftira attı».
Poklonskaya Dmıtro Gordonğa intervyü berip, «o (Çubarov – QA) «Rusiye vatandaşı pasportını aldımı» bilmey, amma Çubarovnıñ «ğaliba, daa Ukraina vaqtında üç pasportı bar edi», dep ayttı.
Qırım Muhtar Cumhuriyetiniñ prokuraturası bildirgenine köre, jurnalist Dmıtro Gordonnıñ Poklonskayanen yapqan intervyüsı oña qarşı cinaiy tahqiqatta qullanılacaq.
Bu intervyüğa Ukraina prezidentiniñ Qırım Muhtar Cumhuriyetindeki daimiy vekili Anton Korınevıç da cevap berdi. Onıñ qayd etkenine köre, «Ukrainanıñ bir parçasını işğal etmege yardım etken şahıslar qırımlılarnıñ sesi sayılmay ve sayılmamalı».
Poklonskaya ve Gordon bu intervyüğa kelgen tenqitke şimdilik cevap bermediler.
Qırım işğalinden evel Natalya Poklonskaya Ukraina prokuratura organlarında çalıştı. 2014 senesi baarinde Kreml kontrolindeki yarımada akimiyeti onı Qırım prokurorı vazifesine tayin etti. O, işğal altındaki yarımadada Qırımtatar Milliy Meclisiniñ faaliyetini yasaqlamağa teklif etken edi.
Poklonskaya Moskvanıñ yarımadada yapqan saylavlarında Rusiye Devlet dumasına saylandı. Ukraina ve Ğarp bu saylavlarnı tanımadı.
Esas Ukrainada Natalya Poklonskayağa qarşı eki cinaiy dava açıldı: devlet hainligi ve Qırımtatar Milliy Meclisiniñ faaliyetini yasaqlav aqqında. O, Avropa Birligi ve bir sıra ayrı memleketniñ sanktsion cedvelinde buluna.
