Qırımda tintüvlerden soñ tutulğan Lenur Yakubov ve İzet Sayfullinni İslâm-Terek qasabasındaki Rusiye Federatsiyası İç işler nazirliginiñ bölük binasına ketirgenler, dep haber ete «Qırım birdemligi» cemaat birleşmesi.
Berilgen malümatqa köre, İslâm-Terekteki Rusiye Federatsiyası İç işler nazirliginiñ binası ögünde tutulğanlarnı beklegen insanlar toplaşa. Tintüvler ve tutuvlarnıñ sebebi daa belli degil. Rusiye uquq qoruyıcıları bu malümatnı izaatlamay.
Advokat Emil Kurbedinovnı Rusiye polisine tutulğanlarnıñ yanına kirsetmeyler.
«İslâm-Terekte polis bölüginiñ kirişinde turam. Nevbetçi telefon ete – kimse açmay. Mındalarmı-yoqmı – aytmay», – dep bildirdi Kurbedinov «Qırım birdemligi» mühbirine.
Daa evel berilgen malümatqa köre, fevralniñ 29-nda saba Eski Qırımda ve Seyit Eli (Juravki) köyünde Rusiye uquq qoruyıcıları dört qırımtatarı Lenur Yakubov, İzet Sayfullin, İdris Yurdamov ve Şevket Kiyamovnıñ evlerinde tintüv keçirdi. Eski Qırım camisi de tintildi.
Tintüvlerden soñ Eski Qırımlı faal ve iş adamı Lenur Yakubov ve «Eski Qırım» mustaqil musulman cemiyetiniñ imamı İzet Sayfullin tutuldı. İdris Yurdamov ve Şevket Kiyamovnı uquq qoruyıcılar evlerinde qaldırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
