Rusiye kontrolindeki Aqmescitniñ Mirovoy mahkemesi «qırımlı musulmanlar davası» mabüsiniñ ömür arqadaşı Ayşe Yakubovağa mahkemede aqayı Eldar Yakubovnı fotoğa çıqarğanı içün tizilgen memuriy protokolğa köre para cezasını berdi.
Bu aqta uquqçı Rustem Kâmilev «Qırım birdemligi» cemaat birleşmesine haber etti.
«Ayşege bir biñ ruble miqdarında para cezası berildi», – dep bildirdi Kâmilev martnıñ 15-nde.
Yanvar ayında Rusiye kontrolindeki Kiyev rayon mahkemesi «qırımlı musulmanlar davası» mabüsiniñ ömür arqadaşı Ayşe Yakubovanıñ Aqmescit SİZO-2-de aqayınen körüşmek yasağına qarşı şikâyetini red etti ve mahkeme vekiliniñ talaplarına riayet etmegeni içün (Rusiye Federatsiyası memuriy uquq bozuvları kodeksiniñ 17.3 maddesiniñ 2-nci qısmı) memuriy memuriy protokol tizdi. Ayşe Yakubovağa bu maddege istinaden 3 biñ ruble para cezası berile bile edi.
Avgustnıñ 24-nde Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi. Tutulğanlar Rusiye Ceza kodeksiniñ 205.5 maddesiniñ birinci qısmına istinaden şübheli sayıldı – terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv. Laf Rusiyede yasaqlanğan Hizb ut-Tahrir teşkilâtı aqqında kete.
Avgustnıñ 25-nde Rusiye kontrolindeki Aqmescitniñ Kiyev rayon mahkemesi tutulğanlarnı eki ayğa SİZOğa yolladı. Bu qarar alınğanda mahkeme binası ögünde oturışuvğa kelgen faaller kütleviy şekilde tutuldı. Umumen 23 kişi tutuldı, dep haber etildi, olarğa Rusiye ordusında askerlik celpnameleri berildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
