"Yabloko" Rusiye fırqası Ukraina ile cenkke qarşı imzalar toplap başladı. İstidanameniñ metni fırqanıñ saytında yayınlanğan. Adresat "Rusiye reberligidir", dep yazıla bildirmede.
İstidanameni "Yabloko" federal siyasiy kömtetiniñ reisi Grigoriy Yavlinskiy, fırqanıñ reisi Nikolay Rıbakov, federal siyasiy kömtetiniñ azaları, şu cümleden Boris Vişnevskiy, Lev Şlosberg, Emiliya Slabunova ve Moskva Helsinki gruppasınıñ reislerinden biri Valeriy Börşçev imzaladı.
"Putinniñ azırlağan Ukraian ile cenk insanlarğa keder ketirecek, ailelerni, biñlerce insannıñ yaşayışını yoq etecek. Bu cenkte ğalebe qazamaq mümkün degil. Er bir netice Rusiye içün felâket olacaq. Er birimiz ve eri biriñiz bunıñ olmaması içün mesülietlidir", - dep yazıla bildirmede.
İmzalar internetten ğayrı, fırqa ofislerinde de toplanılacaq. Pandemiya zamanı buña izin berilgen bölgelerde "Yabloko" narazılıq aktsiyalarını keçirecek.
Bıltır küzde kütleviy haber vastalarında istihbaratnıñ Ukraina sıñırında Rusiye ordusı toplaşqanına dair malümatı peyda olıp başladı. ABD ve diger Ğarp memleketleri Moskva arbiy istilâğa azırlana, dep tahmin ettiler. Kreml bunı inkâr etip, ABD ve NATOdan telükesizlik kefaletlerini talap etti – hususan NATOnı şarqqa kenişletmemek. Ğarp vekilleri printsipial meselelerde uzlaşuv olmaycaq, dep bilrdirgen edi.
