Ukraina Milliy telükesizlik ve mudafaa şurasınıñ kâtip muavini Serğiy Krıvonos emin ki, halqara ortaqlar ile işbirligi Rusiyege qarşı sanktsiyalarnıñ quvetleştirilüvine yol açmalı. Bu aqta o, Ukraina telekanallarından biriniñ yayınında ayttı, dep haber ete «Ukrinform» ukraina haber agentligi.
Onıñ aytqanına köre, Ukraina bu basamaqta problemlerni küçnen al etip olamay ve topraqlarını qanun çerçivesinde qaytarıp bile, eki cebede cenkleşip olamay.
«Şunıñ içün birinci vazife – dünya liderlerinen faal sürette işbirligi yapmaq, Rusiyege qarşı sanktsiyalar aqqında meseleni kötermek, bu sanktsiyalar vastasınen Rusiyeni şöyle bir seviyege ketirmek: ya Qırımnı qaytarırlar, ya da bir şeyleri qalmaz, bu eñ esasıdır. Memlekette mudafaa küçüni quvetleştirmek kerek, ihtiyac olğanda küç usullarınen areket etmek imkânı olmalı», – dedi o.
Krıvonos, halqara Qırım platformasınıñ qurulışı ve Qırım yarımadasınıñ işğalden qurtarıluv meselesini dünya toplulığı seviyesinde kötergen insanlarnı birleştirmek pek müim ola, dep ayttı.
«Rusiye başından berli Qırım işğalinden soñ dünya toplulığını, Ukraina reberligini bu problemden çetleştirip başladı. Onı unutıñız, problemiñiz bar – başta Donbas ile meseleni çeziñiz. Bu adiy mefküreviy oyundır – yalan prioritet ve oriyentirler. Anda baqıñız, bunı ise unutıñız, bu meseleni çeziñiz. Bu şekilde de dünya toplulığı seviyesinde ola. Şunıñ içün Donbas meselesiniñ çezilmesini qayd eteler – Qırımnı kimse aytmay. Aslında ise Qırım meselesi Donbastaki cenk meselesinen aynı seviyede buluna», – dep bildirdi Krıvonos.
ABD Devlet departamentiniñ Ukraina meseleleri sabıq vekili Kurt Volker, ABD, Rusiyege Ukrainağa qarşı istilâ ve Qırım işğali bitmese, sanktsiyalar lâğu etilmeycegini añlatmalı, dep bildirdi.
Radio Free Europe/Radio Liberty Avropa jurnalisti ve muarriri Rikard Jozwiak sentâbrniñ 24-nde bildirgenine köre, Keriç köprüni qurğan şirketlerge qarşı Avropa birligi sanktsiyaları eñ yaqın aftalarda «yeşil ışıq» alacaq.
İyünniñ 18-nde Ukraina Tış işler naziri Dmıtro Kuleba, Avropa Birliginiñ Şurası Qırım işğali sebebinden Rusiyege qarşı sanktsiyalarnı bir yılğa uzattı, dep bildirdi.
Sanktsiyalar 2014 senesi Rusiyeniñ yarımada işğaline qarşı kirsetildi. O vaqıttan berli olarnı uzatıp kenişletken ediler.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
