Kreml nezaretindeki Aqmescit şeer şurası, öz qararınen №44 mektebine qırımtatar hafiyesi, Ekinci cian cenkiniñ iştirakçisi Alime Abdenanovanıñ adını qoydı. Mektepke Alime Abdenanovanıñ adını qoymaq teşebbüsinen talebelerniñ ana-babaları ve mektep ocaları muracaat etti, dep bildire memuriyet başınıñ muavini - şeerniñ rusiyeli memuriyetiniñ tasil idaresiniñ başlığı Tatyana Suhina, dep yaza "Krıminform" matbuatı.
"Tasil idaresiniñ adına, №44 mektebine Alime Abdenanovanıñ adını qoymaq muracaatı keldi. Ocalar ve ana-babalar bu meseleni çezmege teklif etti. Mektepte, vatanperver duyğusını aşılamaq içün daima tedbirler keçirile, olarnıñ kimerisi Alime Abdenanovanıñ şahsiyetine bağışlanğan. O, doğma qırımtatar olğan sovet arbiy adamı, Ulu Vatan cenkiniñ iştirakçisi edi", - dedi Suhina.
2017 senesi sentâbr 1-inde Rusiye nezaretindeki Qırım ükümeti, Aqmescitniñ Yağmurça mikrorayonında №44 orta umumtasil mektebini açtı.
