«Strategiya-30» Rusiye teşebbüsiniñ faalleri sentâbrniñ 30-nda Moskvadaki Arbatta bir kişilik narazılıq aktsiyalarına çıqtı. Faaller siyasiy mabüslerge qol tutmağa istedi. Bu sefer sentâbr ayında çıqarılğan mahkeme ükümleri aqqında aytıldı, olarnıñ arasında Bağçasaraydaki ekinci «Hizb ut-Tahrir davası» (Rusiyede yasaqlanğan teşkilât) da bar edi.
Bu aqta faal Vera Lavreşina Qırım.Aqiqat mühbirine bildirdi.
«Yañlış» iman, imannen bağlı «yañlış» subetler sebebinden. Bu timsaliy davalar: nasıl bir deşet içinde yaşağanımız körüne. İnsanlarnı qorçalamaq içün şimdilik bir şey yapıp olamaymız. Yekâne alet – internet yardımınen aydınlatuv. Bu siyasiy mabüslerniñ azat etilüvini tezleştirecegimizge kiçik bir ümüt bere. Rejim tüşmesini tezleştirecekmiz», – dep tüşüne Lavreşina.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi sentâbrniñ 16-nda Bağçasaraydaki ekinci «Hizb ut-Tahrir davası» boyunca üküm çıqardı. Marlen Asanov 19 yıl sert rejimli koloniyada, Memet Belâlov 18 yıl sert rejimli koloniyada ve bir buçuq yıl sıñırlav; Timur İbragimov 17 yıl sert rejimli koloniyada ve bir buçuq yıl sıñırlav; Server Zekiryayev 13 yıl sert rejimli koloniyada; Server Mustafayev 14 yıl sert rejimli koloniyada ve bir yıl sıñırlav; Seyran Saliyev 16 yıl sert rejimli koloniyada ve bir yıl sıñırlav; Edem Smailov 13 yıl sert rejimli koloniyada ve bir yıl sıñırlavğa üküm etildi. Ernes Ametov qabaatsız tanılıp, mahkemede azat etildi.
«Strategiya-30» aktsiyası çerçivesinde Rusiye muhalifet faalleri er aynıñ 30-nda toplaşıp, «Siyasiy mabüs kününi» keçire. Olar barışıq narazılıq aktsiyalarına çıqıp, siyasiy mabüslerniñ azat etilmesini, Rusiyeniñ Ukrainağa qarşı istilâsınıñ toqtatılmasını ve Qırımnıñ işğalden azat etilmesini talap ete.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
