Tünevin Qırımda 51 koronavirus hastası qayd etildi, dep bildire Qırımnıñ Rusiye yolbaşçısı Sergey Aksenov. Bu, bu aftada artıq ekinci antirekorddır, avgustnıñ 10-unda Qırımda bir künde 48 koronavirus hastası qayd etildi.
"14-ü tibbiy yardım içün muracaat etkende belli oldı, 18-i daa evel hastalanğanlarnen alâqada oldı, 19-ı sağlam insannıñ skriningi vaqtında belli oldı", – dep aytıla Aksenovnıñ Facebook haberinde.
Umumen Qırımda, yerli akimiyetniñ malümatına köre, 1715 yañı koronavirus hastası qayd etildi, 83-ü çetelden keldi, 112-si qomşu Rusiyeden kelgenler ve olarnen alâqada olğanlar. 1190 kişi tüzeldi, 19 hasta koronavirustan vefat etti. Aqyarda yılnıñ başından 408 insan yañı koronavirus yuqunçına oğradı, 326 insan tüzeldi, 12 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
