Link açıqlığı

Saatnıñ esas haberi

Yañı Zelandiyada kerçekleştirilgen ücüm neticesinde 49 insan elâk oldı


Ücümlerden biri Kraystçerç şeeriniñ Al-Nur camisinde kerçekleştirildi
Ücümlerden biri Kraystçerç şeeriniñ Al-Nur camisinde kerçekleştirildi

Yañı Zelandiya akimiyeti Yañı Zelandiyadaki eki camige kerçekleştirilgen ücümler neticesinde elâk olğanlarnıñ sayısı 49-ğa artqanını bildire. Daa 20 kişi yaralandı. Bundan evel elâk olğan 40 insan aqqında haber etilgen edi.

Kraystçerç şeeriniñ merkeziy qısmındaki Al-Nur camisi ve şeer civarındaki camige kerçekleştirilgen ücümni memleketniñ eñ qanlı ücümi dep adlandıralar.

Yañı Zelandiya baş naziri Casinda Ardern ücümni terakt olaraq takbih etti.

«Memleketniñ tarihında eñ qara künlerinden biri», – dedi baş nazir.

Politsiya eñ az dört insan yaqalanğanını bildirdi. Olardan biri martnıñ 16-nda mahkemege çıqarılacaq, onı öldürüvde qabaatladılar, dep bildire politsiya vekili Mayk Buş.

Bundan evel Avstraliya baş naziri Skott Morrison Yañı Zelandiyanıñ Kraystçerç şeerindeki eki camige yapılğan ücüm davası boyunca yaqalanğanlardan biri Avstraliya vatandaşı ola, dep bildirdi.

Atış mesüliyetini öz boynuna alğan insan 28 yaşında avstraliyalı olğanını ayttı. O, ücümni planlaştırmaq ve azırlamaq içün Yañı Zelandiyağa kelgen eken.

Ücüm etken kişi insanlarğa ateş açqanda bunı içtimaiy ağlarda canlı yayında köstere edi.

Politsiya içtimaiy ağlarnıñ qullanıcılarını bu videonı saifelerde paylaşmamağa çağıra, Yañı Zelandiya sakinlerine ise camige barmaqtan vazgeçmege tevsiye etile.

Yerli politsiya komissarınıñ bildirgenine köre, ücümniñ bir qısmı patlavlar olmaq kerek edi. Politsiya hadimleri ücüm etkenlerniñ maşinalarına qoyulğan bombalarnı taptı. Olarnı zararsız alğa ketirgenler.

Memlekette yüksek telüke seviyesi ilân etildi.

XS
SM
MD
LG