Ukraina prezidentiniñ Qırım Muhtar Cumhuriyetindeki daimiy temsilciligi 2020 senesi yanvar ayında Kyivde daa bir ofisini açacaq. Bu aqta noyabrniñ 14-nde Ukraina prezidentiniñ Qırım Muhtar Cumhuriyetindeki daimiy vekiliniñ muavini Tamila Taşeva Qırım.Aqiqatqa bildirdi.
«Oktâbrniñ 17-nde çıqqan buyruqtan soñ temsilcilikke daa çoq vekâlet berildi. Biz köçmeycekmiz (Hersondan – QA). Hersonda ofisimiz qala ve daa bir danesi imkânlarımıznı quvetleştirmek içün Kyivde açıla. Hersonda vatandaşlarnı qabul etken hızmet, analitika ve maliye bölügi qala. Yani yarımadadan çıqqan er bir insan anda muracaat ete bile», – dedi Taşeva.
Onıñ aytqanına köre, şimdi Kyivdeki ofis hadimlerni işke ala ve teşkiliy meselelernen oğraşa.
«2020 senesi yanvar ayından itibaren tolusınen çalışıp başlaycaq. O vaqıtqa qadar onıñ faaliyetini temin etmek kerekmiz. Anda vatandaşlarnıñ muracaatlarınen bağlı büyük hızmet olmaycaq. Amma bizler reberlik olaraq ara-sıra qabul etecekmiz. Bundan ğayrı, mesleat hızmetlerini kösterecek uquqiy bölükte çalışqan insan olacaq. Vatandaşlarnı Hersonda qabul etmege devam etecekler», – dep qoştı o.
Oktâbrniñ 13-nde Kyivdeki matbuat brifingi vaqtında Ukraina prezidentiniñ Qırım Muhtar Cumhuriyetindeki daimiy vekili Anton Korınevıç temsilcilikniñ «strategik merkezi» Kyivde olacaq, «taktik merkezi» ise Hersonda qalacaq, dep qayd etti.
«Böylece, vaqtınca işğal etilgen yerlerde yaşağan vatandaşlarımızğa semereli yardım etmege imkânımız olsun dep, amma aynı vaqıtta icra akimiyet organlarınen bağda olmaq ve adise-vaqialarnıñ merkezinde olmaq, Qırım meselesini umumdevlet kün tertibine çıqarmaq içün eki şeerde çalışacaqmız», – dedi Korınevıç.
Oktâbrniñ 17-nde Ukraina prezidenti Volodımır Zelenskıy, Ukraina prezidentiniñ Qırım Muhtar Cumhuriyetindeki temsilciligi vaqtınca Kyivde yerleşmeli dep, buyruqnı imzaladı.
Daa evel Ukraina prezidenti Volodımır Zelenskıy Ukraina prezidentiniñ Qırım Muhtar Cumhuriyetindeki daimiy vekiliniñ birinci muavini vazifesine Darya Svırıdovanı tayin etti.
«KrımSOS» aq qorçalayıcı teşkilâtınıñ koordinatorı Tamila Taşeva Ukraina prezidentiniñ Qırım Muhtar Cumhuriyetindeki daimiy vekiliniñ muavini vazifesine tayinlendi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
