Ukrainanıñ Jeneva BM daimiy vekili Yuriy Klımenko BM tamır halqlar meseleleri mahsus maruzacısı H.F.Kali Tsay ile interaktiv dialog vaqtında Rusiye işğal etilgen Qırımda insan aqlarını boza, dep tarif etti.
Onıñ qayd etkenine köre, yarımadada Qırımtatar Milliy Meclisiniñ faaliyeti yasaqlandı, qırımtatar tili ise aqsımlana. Klımenkonıñ aytqanına köre, Qırımda ealini qorquzmağa, qırımlılarnı söz ve toplaşuv serbestligi aqqından marum etmege devam eteler.
«Ukraina eyyeti Rusiyeniñ Qırımnıñ yañı müstemlekeleştirüv siyasetini qayd etti, onıñ maqsadı yarımada ealiniñ terkibini deñiştirmektir ve asılında arbiy bir cinayet ola», – dep aytıla Ukrainanıñ BM missiyası haberinde.
Klımenko Qırımdaki vaziyetniñ halqara monitoringi müim olğanını qayd etip, BM Tamır halqlar meseleleri mahsus maruzacısını Ukrainağa davet etti.
Rusiye temsilciligi Ukraina elçisiniñ çıqışına açıq sürette daa cevap bermedi.
Ukrainanıñ BM daimiy vekili Serğiy Kıslıtsâ Rusiye işğal etken Qırımdaki demografik deñişmelerni «büyük problem» dep adlandırdı. Emin ki, Rusiye Ukrainağa qol tutqan ealini yarımadanı terk ettirmege tırışa, bunı BM de bile.
2016 senesi Rusiye kontrolindeki Qırım Yuqarı mahkemesi, soñra da Rusiye Yuqarı mahkemesi qırımtatarlarnıñ temsiliy organı olğan Meclisni yasaqlamağa qarar aldı. Onı Rusiye topraq bütünligini bozmağa tırışa ve insanlarnı qorquza dep, ekstremist teşkilât dep sayğanlar.
Meclis yasağı teklifi işğal etilgen Qırımnıñ sabıq prokurorı Natalya Poklonskayağa aittir.
2017 senesi Ukraina BM halqara mahkemesinde Rusiyeni Ukrainadaki terrorizm tedbirlerine para bergeni ve qol tutqanı, em de Ukrainağa qarşı istilâ yapıp, ırqiy ayırımda iştirak etkeni sebebinden mesüliyetke çektirmek içün oña qarşı dava açtırdı.
Ukraina, BM Halqara mahkemesine muracaat etip, vaziyetniñ acele olğanına emiyet berip, vaqtınca tedbir almağa rica etti. 2017 senesi aprelniñ 19-nda mahkeme Ukraina talaplarınen bağlı Rusiyege qarşı muvaqqat tedbirlerini kirsetmege qarar aldı.
Vesiqada Rusiyeden Meclis faaliyetini yasaq etmek qararı ile qırımtatar halqınıñ menfaatlarını temsil etmesi mevzusında aq-uquqlarınıñ bozulmasını toqtatmağa ve işğal etilgen yarımadada ukrain ve qırımtatar tillerinde tasil berilmesini temin etmekni talap etti.
