Cumaaqşamı, cuma ve bazarertesi künleri Yañı Qapu (Krasnoperekopsk) ve yaqındaki köylerde suv olmaycaq. Qullanıcılar «Progress» teşkilâtı tarafından yañıdan bağlanacaq, dep bildire «Qırım suvı» müessisesi.
Müessiseniñ malümatına köre, Sovhoznoye, Tuzla (Poçötnoye), Beşuyli (Pâtihatka), Qart Qazaq (Tavriçeskoye) ve Risovoye köylerinde üç kün devamında saat 08:00-den saat 00:00-ğa qadar suv olmaycaq.
Cumaaqşamı künü Yañı Qapunıñ Mehanizatorov, Vostoçnaya, mikrorayon №10 soqaqlarında, cuma künü ise sabadan aqşamğa qadar Frunze ve Gogol soqaqlarında suv berilmeycek.
İyül ayınıñ başında şimaliy Qırımda suv berilmesi kerginleşti.
Ukraina Qırımnıñ suv ihtiyaclarınıñ 85%-ını qarşılağan edi. Şimal-Qırım kanalı Dnipro ve yarımadanı bağlağan esas yol edi. 2014 Seneki Rusiye Qırımnı işğal etken soñ yarımadağa suv berilmey qaldı.
Sentâbrniñ 10-nda Ukraina prezidentiniñ Qırımdaki daimiy vekili Boris Babin, Dnipro suvı işğal altındaki Qırımğa berilmeycek dedi. Onıñ fikirince, al-azırda Qırımnıñ ealisine suv yete.
