Keçken künü Qırımda 105 yañı koronavirus hastası qayd etildi, dep bildire Qırımnıñ Rusiye yolbaşçısı Sergey Aksenov.
«73-ü tibbiy yardım içün muracaat etkende qayd etildi, 20-si daa evel qayd etilgen hastalarnen alâqada oldı, 1-i Ukrainadan keldi, 11-i sağlam ealiniñ skriningi neticesinde belli oldı», – dep yazdı Aksenov Facebookta.
Pandemiya vaqtında Qırımda qayd etilgen hasta sayısı bugün eñ büyük oldı.
Umumen Qırımda, yerli akimiyetniñ malümatına köre, 5063 yañı koronavirus hastası qayd etildi. 107-si çetelden keldi, 128-i qomşu Rusiyeden kelgenler ve olarnen alâqada olğanlar, 3008 insan tüzeldi, 69 hasta vefat etti.
Bir kün evelsi qayd etilgen 103 koronavirus hastası aqqında haber etilgen edi. Bugünge qadar bu eñ büyük raqam edi.
Sentâbrniñ 30-nda Qırım ve Aqyardaki Rospotrebnadzor idaresi yarımadada koronavirus hastalarınıñ sayısı artqanı içün cemaat naqliyatında maska taquv qaidelerini sertleştirmege çağırdı. Müessise, aydavcılarnıñ maskasız çalışmasını yasaq etmege teklif etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
