"Serbest Qırımğa mektüpler" teşebbüsi çerçivesinde qırımtatar asıllı ukrayin yırcısı Jamala, Rusiye akimiyeti tarafından 12 yılğa azatlıqtan marum etilgen Aqyar sakini Galina Dovgopolayanıñ mektübini oqudı. Videonı Ukrayina prezidentiniñ Qırım Muhtar Cumhuriyetindeki temsilciligi derc etti.
"Galinanıñ bütün davası uydurılğan — aslında nefaqacını siyasiy sebeplerden taqip eteler. Qadın açıqtan-açıq Qırımnıñ Rusiye işğaline qarşı çıqıp, Ukrayina nezaretindeki topraqlarda faaliyet köstergen ukrayin göñülli teşkilâtlarınen bağ tuta edi", — dep aytıla haberde.
69 yaşındaki qırımlı Rusiye Federatsiyasınıñ Vladimir vilâyetindeki tüzetüv cezahanesinde buluna ve tutuv şaraitleri ve tibbiy yardımnıñ olmağanından şikâyet ete, dep qayd ettiler temsilcilikte.
2019 senesi noyabr ayınıñ soñunda Rusiye Federal havfsızlıq hızmeti işğal etilgen Aqyarda Ukrayina Mudafaa nazirliginiñ istihbaratı içün casuslıq yapqanından şübheli sayılğan qadın tutulğanı aqqında haber etken edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
