2019 senesiniñ başından Qırımda 147 qızamıq hastalığı resmiy qayd etildi, olarnıñ 13-ü - Aqyarda. Bu aqta Rosdpotrebnadzornıñ Qırım idaresiniñ matbuat hızmeti bildirmekte.
Mayısnıñ 5-ine qadar Qırımda 16806 adamğa aşılav yapıldı, olardan 2689-ı bala, Aqyarda - 1155 adam, olardan 272-si bala, dep bildirdiler müessisede ve bütün sakinlerge qızamıqqa qarşı aşılanmaq tevsiye ettiler.
Aprelniñ soñunda Qırım ve Aqyarda qızamıq hastalığınıñ 138 adisesi qayd etildi, olardan 127-si Qırım cumhuriyetinde, 11-i - Aqyarda
Qırımda aprelniñ 1-nden başlap ealige qızamıqqa qarşı qoşma aşı yapılıp başladı. Bu aqta Qırımnıñ Rusiye sağlıq nazirliginiñ matbuat hızmeti bildirdi.
2018 senesi Dünya sağlıq teşkilâtı Avropada qızamıq hastalığınıñ rekord seviyesine çıqqanını qayd etti. Birinci 6 ayda 41 biñ insan qızamıq oldı, soñki 10 yılda er yıl olğanından daa ziyade.
Qızamıq adamdan-adamğa qolaylıqnen keçe, öksürik, yaqın toqunuvlarnen keçe. Virus eki saat devamında faal qalıp, avada ya da ten üstünde yaşay. Hasta başta sade suvuqlanuv alâmetlerini duya: tımav, sıcaqlıq, öksürik, tahminen bir aftadan eşken peyda ola (evelâ başta, soñ - bedenniñ yuqarı ve tüpteki qısımlarında). Qızamıq sebep olğan ağırlaşuvlarnıñ arasında - siñir sistemasınıñ zararlanuvı (entsefalit), pnevmoniya, otit, körüv qabiliyetiniñ ğayıp oluvı bar.
